Ommaviy oferta
Tizim24 amoCRM vidjetlaridan foydalanish va vidjetlar hamkorlik dasturi to‘g‘risidagi shartnoma
| Hujjat tahriri | № 1.0 |
|---|---|
| Nashr etilgan va kuchga kirgan sana | 10.10.2026 |
| Doimiy manzil | https://tizim24-widget.uz/uz/oferta |
| Amal qilish hududi | O‘zbekiston Respublikasi |
Preambula
Ushbu hujjat «INSIGHT EDU» MChJ (brend — «Tizim24», keyingi o‘rinlarda — Ijrochi) tomonidan O‘zbekiston Respublikasi Fuqarolik kodeksining 367–370-moddalari va «Elektron tijorat to‘g‘risida»gi Qonunga (O‘RQ-792) muvofiq e’lon qilingan ommaviy ofertadir.
Oferta amoCRM (Kommo) tizimidan foydalanuvchi yuridik shaxslar, yakka tartibdagi tadbirkorlar va 18 yoshga to‘lgan muomalaga layoqatli jismoniy shaxslarga (keyingi o‘rinlarda — Foydalanuvchi) hamda vidjetlar hamkorlik dasturi ishtirokchilariga (keyingi o‘rinlarda — Hamkor) qaratilgan.
Ushbu shartlarga rozi bo‘lmasangiz, vidjetlarni o‘rnatmang va ulardan foydalanmang.
1. Atamalar
Vidjet — Ijrochiga tegishli, amoCRM akkauntiga amoMarket katalogi orqali o‘rnatiladigan va Ijrochi serverlari bilan birga ishlaydigan dasturiy kengaytma.
Sayt — https://tizim24-widget.uz va uning sahifalari; Hamkor kabineti — https://partner.tizim24-widget.uz.
Obuna — bitta amoCRM akkaunti va bitta vidjet bo‘yicha foydalanish huquqi va uning amal qilish muddati.
Sinov muddati — vidjet o‘rnatilgandan keyin bepul foydalanish davri; uning davomiyligi vidjet sahifasida yoki vidjet panelida ko‘rsatiladi.
Integratsiya — vidjet o‘rnatilgach Foydalanuvchi tasdiqlash kodi (SMS, Telegram yoki email orqali) bilan yoki Hamkor ID (Partner ID) bilan akkauntni tasdiqlash bosqichi.
2. Oferta predmeti
2.1. Ijrochi Foydalanuvchiga vidjetlardan Obuna asosida foydalanish uchun oddiy (eksklyuziv bo‘lmagan) huquq beradi, Foydalanuvchi esa pullik vidjetlar uchun belgilangan haqni to‘laydi.
2.2. Vidjetlar ro‘yxati, tavsifi, imkoniyatlari va narxlari Saytda hamda vidjet ichidagi «Тариф и оплата» bo‘limida ko‘rsatiladi. Ayrim vidjetlar bepul.
2.3. Vidjet amoCRM ichida ishlaydi; uning ishlashi amoCRM va boshqa uchinchi shaxs xizmatlariga (masalan, Telegram) bog‘liq bo‘lishi mumkin.
3. Aksept
3.1. Quyidagi harakatlardan biri ofertani to‘liq aksept qilish hisoblanadi: vidjetni amoMarket’dan o‘rnatish va kirish huquqini berish («Установить» → «Разрешить»); Integratsiyani yakunlash; vidjet uchun to‘lov qilish; Hamkorlik dasturiga ariza yuborish yoki Hamkor kabinetidan foydalanish.
3.2. Vidjetni o‘rnatgan shaxs Foydalanuvchi nomidan harakat qilish huquqiga ega ekanini tasdiqlaydi.
4. O‘rnatish, Integratsiya va Sinov muddati
4.1. Vidjet faqat amoCRM akkauntining administratori tomonidan amoMarket orqali o‘rnatiladi. O‘rnatilganda Sinov muddati boshlanadi; vidjet qayta o‘rnatilganda Sinov muddati qayta boshlanmaydi.
4.2. Integratsiya har bir vidjetda, jumladan bepul vidjetlarda ham majburiy. Integratsiya yakunlanmaguncha vidjet o‘z vazifasini bajarmaydi.
4.3. Integratsiyada telefon raqami, email yoki Telegram orqali tasdiqlash kodi olinadi yoki Hamkor ID kiritiladi. Ism so‘ralmaydi.
5. Narx va to‘lov
5.1. Narxlar O‘zbekiston Respublikasi so‘mida belgilanadi. Obuna 1, 6 yoki 12 oyga to‘lanadi; uzoq muddatga chegirmalar to‘lov sahifasida ko‘rsatiladi.
5.2. Ijrochi aylanmadan olinadigan soliq to‘lovchisi; narxlarga QQS qo‘shilmaydi.
5.3. To‘lov Saytdagi to‘lov sahifasi orqali onlayn to‘lov tizimlari (Payme va boshqalar) yoki bank o‘tkazmasi orqali amalga oshiriladi. Karta ma’lumotlari to‘lov tizimida kiritiladi va Ijrochiga berilmaydi.
5.4. To‘lov majburiyati pul Ijrochining hisob raqamiga kelib tushganda bajarilgan hisoblanadi. To‘lov tasdiqlanishi bilan Obuna avtomatik uzayadi: joriy to‘langan muddat tugamagan bo‘lsa — uning davomidan, aks holda (shu jumladan Sinov muddatida to‘langanda) — to‘lov kunidan boshlab.
5.5. Avtomatik takroriy yechib olish (avtoto‘lov) qo‘llanilmaydi — har bir davr alohida to‘lanadi.
5.6. Ijrochi narxlarni o‘zgartirishi mumkin; bu allaqachon to‘langan davrga ta’sir qilmaydi. Narx o‘zgarishi Saytda kamida 30 kalendar kun oldin e’lon qilinadi.
6. Obuna tugashi va to‘xtatilishi
6.1. Obuna muddati tugasa, vidjetning asosiy vazifasi to‘xtaydi. Foydalanuvchining sozlamalari va ma’lumotlari o‘chirilmaydi; to‘lovdan keyin vidjet davom etadi.
6.2. Ijrochi quyidagi hollarda Obunani to‘xtatib turishi mumkin: ushbu Oferta buzilganda, vidjetdan noqonuniy maqsadda foydalanilganda, xavfsizlikka tahdid yuzaga kelganda yoki vakolatli organ talabi bilan.
6.3. Foydalanuvchi vidjetni istalgan vaqtda amoCRM’dan o‘chirishi mumkin; o‘chirilganda amoCRM kirish kalitlari Ijrochi serverlaridan darhol o‘chiriladi.
7. Pulni qaytarish
7.1. Foydalanuvchi tashabbusi bilan qaytariladigan summa = to‘langan summa − haqiqatda foydalanilgan davr qiymati − Ijrochi ko‘rgan haqiqiy xarajatlar (jumladan to‘lov tizimi komissiyasi).
7.2. Ariza support@tizim24.uz manziliga yuboriladi, 10 ish kuni ichida ko‘rib chiqiladi; ijobiy hal etilganda mablag‘ keyingi 10 ish kuni ichida qaytariladi. Qaytarilganda Obuna muddati mos ravishda qisqaradi.
8. Taraflarning huquq va majburiyatlari
8.1. Foydalanuvchi: vidjetdan qonunchilik va amoCRM qoidalariga muvofiq foydalanadi; vidjet kodini o‘zgartirmaydi, dekompilyatsiya qilmaydi va tarqatmaydi; o‘z mijozlarining shaxsga doir ma’lumotlariga ishlov berishda qonun talablariga (jumladan rozilik olishga) o‘zi rioya qiladi; Telegram vidjetidan Telegram foydalanish shartlariga muvofiq foydalanadi.
8.2. Ijrochi: vidjetlarning ishlashini ta’minlaydi, ularni yangilab boradi, texnik yordam ko‘rsatadi (Telegram, email, telefon orqali) va rejalashtirilgan ishlar haqida imkon qadar oldindan xabar beradi.
8.3. Ijrochi vidjet funksiyalarini yaxshilash maqsadida o‘zgartirishi mumkin, bunda to‘langan davrda asosiy vazifa saqlanadi.
9. Uchinchi shaxs xizmatlari
9.1. amoCRM (Kommo), amoMarket, Telegram, to‘lov tizimlari va aloqa operatorlari uchinchi shaxslarga tegishli. Ularning ishlamasligi, cheklovlari yoki qoidalari o‘zgarishi natijasida vidjet ishida yuzaga kelgan uzilishlar uchun Ijrochi javobgar emas, lekin ularni bartaraf etish uchun oqilona choralar ko‘radi.
10. Intellektual mulk
10.1. Vidjetlar, ularning kodi, dizayni, «Tizim24» brendi va Sayt materiallari Ijrochiga tegishli. Ushbu Oferta Foydalanuvchiga faqat Obuna doirasida foydalanish huquqini beradi.
11. Shaxsga doir ma’lumotlar
11.1. Ma’lumotlarga ishlov berish https://tizim24-widget.uz/uz/maxfiylik manzilidagi Maxfiylik siyosatiga muvofiq amalga oshiriladi. Ma’lumotlar O‘zbekiston Respublikasi hududidagi serverlarda saqlanadi.
12. Javobgarlik
12.1. Vidjetlar «boricha» taqdim etiladi; Ijrochi ularning Foydalanuvchining barcha kutganlariga mos kelishini kafolatlamaydi.
12.2. Ijrochi boy berilgan foyda, bilvosita zarar, mijozlar yoki bitimlarning yo‘qotilishi uchun javobgar emas.
12.3. Ijrochining jami javobgarligi da’vo yuzaga kelgan sanadan oldingi 3 oy davomida shu vidjet uchun haqiqatda to‘langan summadan oshmaydi. Ushbu cheklovlar iste’molchilarga nisbatan qonunchilikda ruxsat etilgan doirada qo‘llaniladi.
12.4. Fors-major holatlarida (tabiiy ofat, urush, davlat organlarining qarorlari, keng ko‘lamli aloqa uzilishlari va h.k.) Taraflar javobgarlikdan ozod bo‘ladi.
13. Vidjetlar hamkorlik dasturi
13.1. Hamkorlik dasturiga Saytdagi «Hamkorlar» sahifasi orqali ariza beriladi. Ijrochi arizani ko‘rib chiqadi va tasdiqlasa, Hamkorga Hamkor ID va Hamkor kabinetiga kirish beriladi. Ijrochi sabab ko‘rsatmasdan rad etishga haqli.
13.2. Mijoz Hamkorga quyidagicha biriktiriladi: mijoz Integratsiyada Hamkor ID ni kiritadi yoki Hamkor mijozni Hamkor kabinetida qo‘shadi. Boshqa Hamkorga biriktirilgan yoki Ijrochining to‘g‘ridan-to‘g‘ri mijozi Hamkorga o‘tkazilmaydi — bunday so‘rovni faqat Ijrochi hal qiladi.
13.3. Ulush (keshbek): biriktirilgan mijoz vidjet uchun to‘lagan va Ijrochi hisobiga kelib tushgan summadan hisoblanadi — Obunaning birinchi to‘lovidan va keyingi to‘lovlaridan alohida foiz bilan. Foizlar va har bir yozuv Hamkor kabinetida ko‘rsatiladi. Mijozga pul qaytarilsa, ulush mutanosib ravishda kamaytiriladi.
13.4. Pul yechish: Hamkor kabinetida so‘rov yuboriladi (karta raqami; saqlanadigani faqat oxirgi 4 raqam). Minimal summa kabinetda ko‘rsatiladi. Ijrochi so‘rovni tasdiqlaydi va o‘tkazadi; Hamkor o‘z daromadidan soliqlarni mustaqil to‘laydi (qonunda nazarda tutilgan hollarda Ijrochi soliq agenti sifatida ushlab qoladi).
13.5. Hamkorga taqiqlanadi: o‘z-o‘ziga yoki affillangan shaxslarga tavsiya berish; soxta yoki mijozning xabarisiz mijoz qo‘shish; Ijrochi nomidan to‘lov qabul qilish yoki va’da berish; «Tizim24» brendidan Ijrochi roziligisiz domen yoki reklama kalit so‘zi sifatida foydalanish. Buzilganda Ijrochi ulushni to‘lamaslik va Hamkorni dasturdan chiqarish huquqiga ega.
13.6. Har bir Taraf hamkorlikni 10 ish kuni oldin xabar berib to‘xtatishi mumkin; shu kungacha hisoblangan va shartlari bajarilgan ulush to‘lanadi. Ijrochi dastur shartlarini o‘zgartirishi mumkin, bunda Hamkorni kamida 15 kalendar kun oldin xabardor qiladi.
14. Amal qilish muddati, o‘zgartirish va nizolar
14.1. Shartnoma aksept paytidan kuchga kiradi va vidjet o‘rnatilgan yoki Hamkorlik davom etayotgan davrda amal qiladi.
14.2. Ijrochi Ofertaga o‘zgartirish kiritishi mumkin; yangi tahrir Saytda e’lon qilingan kundan kuchga kiradi, muhim o‘zgarishlar kamida 10 kalendar kun oldin e’lon qilinadi. Foydalanishni davom ettirish yangi tahrirni qabul qilish hisoblanadi.
14.3. Nizolar muzokara yo‘li bilan hal qilinadi; da’vo (pretenziya) tartibi majburiy, da’voga 15 ish kuni ichida javob beriladi. Hal bo‘lmagan nizolar O‘zbekiston Respublikasi qonunchiligiga muvofiq sudda ko‘riladi. Elektron yozishmalar va tizim jurnallari dalil sifatida tan olinadi.
14.4. Oferta o‘zbek tilida tuzilgan; rus va ingliz tilidagi matnlar ma’lumot uchun. Ziddiyat bo‘lsa, o‘zbekcha matn ustun turadi.
Ijrochining rekvizitlari
| To‘liq nomi | «INSIGHT EDU» mas’uliyati cheklangan jamiyati |
|---|---|
| Brend nomi | Tizim24 |
| STIR (INN) | 309632038 |
| Yuridik manzil | Samarqand viloyati, Samarqand shahri, Nurafshon MFY, Umid ko‘chasi, 8-uy |
| Hisob raqami | 20208000905536713001 |
| Bank | «Aloqabank» ATB, Samarqand filiali |
| MFO | 00401 |
| Direktor | Nasriddinov Firdavs |
| Telefon | +998 99 652 55 22 |
| Elektron pochta | support@tizim24.uz |
| Telegram | @amirtizim24 |
| Sayt | https://tizim24-widget.uz |